ကြုံတွေ့နေရတဲ့ အခက်အခဲတွေကို Facebook ပေါ်တင်မိလို့ အလုပ်တန်းထုတ်ခံရတဲ့ Food Panda Rider အလုပ်သမားလေ

လူမှုကွန်ရက် စာမျက်နှာပေါ်မှာ ကုမ္ပဏီရဲ့ လိုအပ်ချက်တွေကို ရေးသားဖော်ပြခဲ့တဲ့ foodpanda rider တစ်ဦးရဲ့ post ကို ကိုယ်ပိုင်အကောင့်မှာ ပြန်လည်ဝေမျှခဲ့တဲ့ rider (၃) ဦးကို food panda Myanmar ကုမ္ပဏီက အလုပ်ထုတ်လိုက်တယ်လို့ အလုပ်ထုတ်ခံရတဲ့ ဝန်ထမ်းတွေဆီကနေ သိရပါတယ်။

လုံးဝအထုတ်ခံလိုက်ရပြီ။ အခုလိုထုတ်တာကြီးကတော့ ကျွန်တော်တို့ ထမင်းအိုးကိုရိုက်ခွဲလိုက်သလိုပဲ။ ချက်ချင်းကြီး ထုတ်တယ်ဆိုပြီးလုပ်တာ။ အမှန်ဆို အလုပ်စလုပ်ကတည်းက သူတို့စည်းကမ်းချက်ထဲမှာလည်း ပါပြီးသား။

ဝန်ထမ်းတွေ တစ်ခုခုအမှားရှိခဲ့ရင် ပထမအကြိမ်၊ ဒုတိယအကြိမ်ဆိုပြီး သတိပေးချက်မျိုးရှိရမှာ၊ အခုဟာက တစ်ခါတည်းဖြုတ်တယ်ဆိုတာက လုံးဝမဖြစ်သင့်ဘူး။ လုပ်လာခဲ့တဲ့ တလျှောက်လည်း ဘာပြစ်ချက်မှမရှိဘူး။ customer တွေနဲ့ ဘာပြဿနာမှမရှိခဲ့ဘူး။ ကျွန်တော်တို့တွေ Facebook မှာ ရေးတင်တယ်ဆိုတာလည်း

တကယ်ဝန်ထမ်းတွေကြုံတွေ့နေရတဲ့ အရာတွေပဲ ကျန်တဲ့သူတွေ မေးကြည့်လည်းရတယ်။ ဒါကိုကုမ္ပဏီဘက်က မဖြေရှင်းပေးဘဲ အလုပ်ထုတ်လိုက်တာမျိုးကျတော့ လုံးဝမကျေနပ်ဘူးဗျာ” လို့ အလုပ်ထုတ်ခံလိုက်ရတဲ့ rider တစ်ဦးက ပြောပါတယ်။

အလုပ်ထုတ်ခံရတဲ့ rider တွေအနေနဲ့ အလုပ်ထုတ်ခံရတဲ့ နိုဝင်ဘာလ (၁၉)ရက်နေ့က ကုမ္ပဏီရဲ့တာဝန်ရှိသူနဲ့ တွေ့ဆုံဖို့ သွားရောက် တွေ့ဆုံခဲ့ကြပေမယ့်လည်း အလုပ်ထုတ်လိုက်ကြောင်း အဖြေသာရရှိခဲ့ကြတယ်လို့ ဆိုပါတယ်။ “ မူရင်း post တင်တဲ့သူက fake အကောင့်နဲ့ တင်လိုက်တာ။

အဲဒါကို ကျွန်တော်တို့က copy ယူပြီး ကိုယ့်အကောင့်တွေမှာပြန်တင်လိုက်ကြတာပါ။ အခုထုတ်ခံရတဲ့ (၃) ယောက်မှာ မူရင်း post တင်တဲ့သူမပါဘူး။ ပြန်ကူးတင်တဲ့သူတွေပဲ။ ကျွန်တော်တို့ကလည်း သူတင်ထားတာတွေက ကိုယ့်ခံစားချက်တွေအတိုင်းပဲ လက်တွေ့လည်းအဲလိုဖြစ်နေတာဆိုတော့ အမှန်ကိုဖော်ပြတဲ့သဘော။

တကယ်လည်း ကုမ္ပဏီကဝန်ထမ်းတွေနဲ့ ပတ်သက်လို့ ဘာတာဝန်ယူမှုမှမရှိဘူး။ ကျွန်တော်တို့ rider တွေထဲက တစ်ခုခုဖြစ်တယ်ဆိုတောင် rider တွေအားလုံးပဲစုပြီး ကိုယ်တက်နိုင်သလောက် ၁၀၀၀ ဆီစုပြီး ပြန်ထောက်ပံ့နေကြရတာ။

အခက်အခဲဖြစ်နေတဲ့ ကာလတွေတစ်လျှောက်လည်း ဘာမှကူညီထောက်ပံ့ခဲ့တာတွေ မရှိဘူးလို့ နောက်ထပ်အလုပ်ထုတ်ခံလိုက်ရသူ တစ်ဦးကပြောပါတယ်။ အလုပ်ထုတ်ခံရတဲ့ ဝန်ထမ်းတွေရဲ့ ပြောပြချက်နဲ့ လူမှုကွန်ရက်မှာရေးသားတင်ခဲ့တဲ့ post မှာပါဝင်ခဲ့တဲ့ အကြောင်းအရာတွေနဲ့ ပတ်သက်လို့

food panda Myanmar ကုမ္ပဏီဘက်ကို ဆက်သွယ်မေးမြန်းတဲ့အခါမှာ အခုလို ပြန်လည် ဖြေကြားပါတယ်။ “မကြာသေးခင်က ဖြစ်သွားတဲ့ rider ယာဉ်တိုက်မှုနဲ့ပတ်သက်ပြီး ကျွန်တော်တို့လည်း များစွာစိတ်မကောင်းဖြစ်ရပြီး ကုမ္ပဏီအနေနဲ့ အတတ်နိုင်ဆုံး ကူညီထောက်ပံ့မှုတွေကို ပြုလုပ်ပေးခဲ့ပါတယ်” လို့

food panda Myanmar မှ တာဝန်ရှိသူတစ်ဦးက ဆိုပါတယ်။ ဒါ့အပြင် အလုပ်ထုတ်လိုက်တဲ့ ဝန်ထမ်းသုံးဦးနဲ့ ပတ်သက်ပြီးတော့လည်း အဆင့်ဆင့်သေချာစဉ်းစားပြီးမှ ဆုံးဖြတ်ခဲ့ခြင်းဖြစ်ကြောင်း ဖြေကြားပါတယ်။

“ဒီဖြစ်စဉ်ဖြစ်ပွားပြီးတဲ့အချိန်မှာ ကျွန်တော်တို့အနေနဲ့လည်း post တင်ခဲ့တဲ့ rider ကို လူချင်းတွေ့ခဲ့ပါတယ်။ အဓိကကတော့ ကုမ္ပဏီဖက်က လုပ်ဆောင်ပေးခဲ့တဲ့ဖြစ်ရပ်နဲ့ လူမှုကွန်ယက်မှာ ပြန့်နှံ့နေတဲ့ဖြစ်ရပ်ကြား မတူညီကွဲပြားချက်တွေ တွေ့ရတဲ့အတွက် အခုလိုတွေ့ဆုံမေးမြန်းခဲ့တာပါ။

နောက်ပြီး ကျွန်တော်တို့ဘက်က လုပ်ဆောင်ခဲ့တာတွေကို ပြောပြခဲ့ပြီး rider တင်ထားတဲ့ပို့စ်မှ မမှန်ကန်သော အချက်များကို ပြောပြပေးခဲ့ပါတယ်။ ဒီလိုပြောပြပေးခဲ့ပေမဲ့လည်း rider အနေနဲ့ မှားယွင်းတဲ့ သတင်းကို ဆက်လက်ဖြန့်ဝေနေခဲ့ပါတယ်။

အသေးစိတ်စုံစမ်းစစ်ဆေးကြည့်တဲ့အခါမှာ ဒီ rider များအနေနဲ့က အခုလိုမျိုး ကုမ္ပဏီကိုထိခိုက်စေတဲ့ မမှန်မကန် ရေးသားမှုမျိုး အရင်ကတည်းက ရှိခဲ့ဖူးတဲ့အတွက် ကျွန်တော်တို့အဆင့်ဆင့် စဉ်းစားပြီး rider နဲ့ လက်တွဲဖြုတ်လိုက်ရခြင်း ဖြစ်ပါတယ်” လို့ ဆိုပါတယ်။

အလုပ်ထုတ်ခံရတဲ့ rider တွေနဲ့ ကုမ္ပဏီကြားမှာ ဆက်လက်ညှိနှိုင်းတာမျိုးမရှိတော့ဘဲ rider တွေဘက်က အလုပ်လုပ်စဉ်အတွင်း ကုမ္ပဏီကထုတ်ပေးထားတဲ့ food box တစ်လုံး၊ ယူနီဖောင်း ၃ထည်နဲ့ ဦးထုပ် ၁ လုံးတို့ကို နိုဝင်ဘာလ ၂၂ ရက်နေ့က သွားအပ်ထားပြီးဖြစ်တယ်လို့ သိရပါတယ်။

Be the first to comment

Leave a Reply

Your email address will not be published.


*